Wellt er amool
wos recht Schienes saahn,
do misst ihr zu Weihnachta ei`s Geberche fahn
`s ìs`
zwoor ei`m Summer a recht
schien
üwer a Wenter
ei`m Geberche tut dennoch nischt giehn.
Schnie hot`s woll genung
a is kamm zum derwoota
on iewerool
die Wendstreche
wie ei`m Summer die Schwoota.
on kaalt
is zum Nosaspetzla d`rfriesa.
Vom Koppe denkt ma
die Ahrn zu verliesa.
On wenn erscht
die Näle aus a Schendan sprenga,
do hert ma vor Kälde die Engalan senga.
Bis eis Dorf treibt der Honger die scheua Riehe,
sie komma
kamm fot ei dam hucha Schnieè.
Zu a Hoisan
die hongricha Vöchalan komma,
on klaun
a jedes Brenkala Futter zusomma.
On asu is`s fost emmer
zur Weihnachtszeit,
onser Derfla
bis onder die Fanster
verschneit.
Uff a heilicha
Omd tun sich olle schon freen,
ma konn üwer die schlemsta Kender ne kleen.
`s nemmt
sich a Jedes ontlich zusomma,
denn ei a poor
Tacha soll`s Kresskendla komma.
On war ne gefolcht
hot
on gut toot
ei`m Haus
dar gieht
beim Beschenka dr`nocht laar aus.
Die Mutter tot fleißich
schon Kreststriezl backa,
tut Zockerzeug rechta,
Nesse knacka,
Zoppa vergolda, on Popierkeete
pecha
fer`s Chrestbämla
–
wo`s der Voter
verwecha on verhohla hot aus`m Posche gehullt,
wie die Kender
Ooms ei a Schloof eigelullt.
Om Krestoomde
nemmt halt der Tag gor kei`Ende,
ma dächt doss die Sonne heut nonder ne
fände,
d`r kerzeste
Tag woor uns emmer zu lang.
On wurd`s
endlich Oomd,
seet a jedes: Gott sei Dank.
Beim Lichtmacha
musste ma`obacht gahn,
on a jeder musste gutt uff sen Schoota
sahn,
denn wenn dar kenn Koop hotte,
do säta
se goor
dar müsste aus der Welt ei dam kenfticha Johr.
Verschiedene a toota
die Zukunft d`rforscha,
die ledicha
Meedlan, die ledicha Porscha.
Bleigissa, Glecke
hewa, Hinner uffjehn,
olle Sacha
zielta druff naus,
zu drfohn , war zu Johre heirat`aus`m Haus.
`s Oomdassa
wor gor feierlich,
Sechs, Siebnerlee
zo Assa wor`s secherlich.
Pelzsoppe, Hefakließlan,
gekochte Frechte, Saamlmelch,
on noch and`re
Gerechte.
Wie`s wor
halt schon zu Urgroßvooters Zeita,
tun se heute noch a Kressoomd bestreita.
Dr`nooch wurd`s Kressbäämla oogezondt,
on a jeder dronder
sei Geschenkla foond.
Die Kender
wurda nee lange gfroocht,
ob se wolda
oder nee, ei`s Bette gebroocht.
Die Gruußa
muchta nischt heern vom Bette,
die wotta
uff`s dreimoliche Glockagelette,
weil olle em
Zwelfe ei die Kressmasse giehn,
denn die is
gor feierlich on wunderschien.
Dorchs ganze
Dorf kemmt a langer Zug,
fost
a jeder a brienich Loternla trug.
Aus`m Posche,
vo da`Borcha, vo` ieweroll har,
pelchert zur Kerche
die fromme Schar.
zu grissa
dos Kendla, da Heilicha Krist,
dar ei Bethlehem heut zur Welt komma is`.
Suu feian mer a heilicha Oomd olle Joor,
on heute noch asuu,
wie`s halt emmer woor.
O`a aala Gebräucha wird feste gehaala,
doo
droo tut`s ei onserm Geberche
nee faala.
`s Ollerschienste
wos ma halt sitt
is`d`r Puusch,
da mit Ooraun eim Wenterschmucke stieht.
Drom misst èr
ei`m Wenter ei`s Geberche faahn,
wenn èr
wellt a mool wos recht Schienes sahn..
OOraun
-- Rauhreif
Übermittelt von Nora Steingruber (geb. Zeipelt)